بكلمة

انارة حياتها بكلمة
فلقد رأي قلبها ولم ينهشه

بكلمة

غير حياتها بكلمة لانه الوحيد الذي راي قلبها

ولم ينهشه

فيلم جسر إلى تيرابيثيا

" أغمض عينيك وأبقي عقلك مفتوحًا"

فيلم بيتكلم عن ولد اسمه " جيس أرون" بيحب الرسم وبسبب عدم تقدير أسرته له تحول إلى أنسان انطوائي، لما كان بيرسم على سريره كان بيعمل ساتر من بطانيته عشان مشوفوش رسوماته لأنها مش مهم ليهم، لحد لما قابل بنت "ليزلي بارك" زميلته في المدرسة انبهر بخيالها الواسع، وبدأت بينهم صداقة، وأخدته لمكان في الغابة كان بيعبروه عن طريق حبل اللي كان وهن واللي هيكون سبب في وفاتها، الغابة دي أطلقت عليها اسم"ترابيثيا" وقالت له وهو بيشوف عالم الخيال" اغمض عينيك وأبقى عقلك مفتوحً"، وطلبت من الولد أنهم يجددوا بيت خشب اللي فوق الشجرة، وحطوا فيها كل حاجة بيحبوها، المكان ده كان هو رمز لخيالهم البنت ساعدته أن الواقع المرير من عدم اعتراف أهله بموهبته أنه ميلغيش خياله ولا يعيش فيه على الهامش ولا أنه يغطي نفس ببطانية عشان يرسم ولا أنه يعيش خياله في رسمة بس، لأ يكون بطل في عالم خياله يعيش فيه بكيانه بروحه بقلبه بكل حواسه، وفي عيد ميلاده أبوه اشترى لي قطر حاجة مش من اهتمامته لكن البنت اشتريت لي أحلى علبة ألوان، ساعدته أنه يتعرف على الخيال وميكونش سجين الواقع، لأن الخيال هو اللي هيساعده يعيش الواقع ويتحمله، وهي دي الصداقة المشاركة وأن الصديق يغيرك للأفضل أنه يساعدك على اللي بتحبه، أنه يحس بيك، ولما ماتت صديقته كان مشهد رئيسي أنه تحول من إنسان انطوائي يتحاشى الناس إلى إنسان قدر يعبر من الواقع إلى الخيال بقدم ثابتة وأنه يساعد أخته الصغيرة أنها تبني خيالها وتكبره.

جسر إلى تيرابيثيا هي رواية أطفال تأليف كاترينا باتيرسون

أين الحب؟

وقف أمام مرآته المكسورة

يسأل أين الحب؟

هل هو حبي الأول؟!

أما ما أعيشه الآن

أما أنه لم يأتي بعد

جاءه الجواب

إذا كنت أحببت بالفعل

لماذا ما زلت تبحث عن الحب؟!

"أعتبريه جبل صغير عارفه من زمان وبتحبيه"

"أعتبريه جبل صغير عارفه من زمان وبتحبيه" 

مهند طفل عنده 13 سنة تقريبا قالي كدا أمبارح وأنا خايفة أتسلق الحبال في منطقة الألعاب، أنا فعلا بخاف من أي لعبة لأني وأنا صغيرة ماما كانت بتخاف عليا بزيادة جداااااااااااااا لحد ما كبرت وفضل الخوف حبسني وبعدني عن حاجات حلوة في حياتي، لكن مهند أمبارح خلاني أكسر حاجز خوفي فضل يعلمني ولما جيت أعدي بين حبال كتير أقالي "لازم لما تواجهي يكون عندك توازن وتعرف تواجهي خوفك عشان تنتصري عليه" وقبل ما أنزل قالي تعالي أطلعي فوق خالص لكن أنا كنت لسه بواجهه خوفي واحدة واحدة فقولتله المرة اللي جاية، شكرت مهند كتير راح قالي لو احتجتي أي مساعدة قوليلي، قولتله أنت عسل وسكر يا مهند، في الحقيقة أنا أكبر منه بكتير جداااا لكن مكتسفتش أتعلم منه لأني أنا عارفة كل إنسان هقابله في حياتي هيعلمني حاجة حتى لو طفل، أنا زعلت بجد أني متصورتش معه يارب أقابلك تاني وأتصور معك وتعلمني حاجات تانية يا مهند ربنا يحفظك ويحقق ليك كل أحلامك، شكرا أنك خلتني أعيش حاجة جديدة ولقيتها أد أيه هي ممتعة ورجعتني طفلة وسحبت كتير من وجعي

وم😊

مش هحط صورة لحد لما أقابلك تاني يا مهند 

تجربتي مع نشر الكتاب

في البداية بعتذر لكل الناس اللي أتأخرت عليهم في الرد نظرا لظروف خارجة عن إرادتي

ودلوقتي هكتب عن موضوع نشر الكتاب من خلال تجربتي لأن في ناس كتير بتسألني عن تجربتي مع النشر..

أولًا: الحياة مش وردية على أرض الواقع "مش بقول كدا إحباط لأ بقول كدا عشان تبقى محضر نفسك مش أكتر" لأننا في مجتمع شايف أن اللي بيكتب بيتسلى، ودور النشر في منها اللي بيسترزق وبتستغل حلم الكاتب اللي لسه في أول طريقه عشان تحطمه للأسف مش تبنيه، وفي دار نشر بتهتم بالمحتوى وطبعا دي دار نشر محترمة.

ثانيا: تجربتي مع كتابي قهوة وقطعة حلوى كل وقت وله أدان وهيجي اليوم اللي أتكلم فيه عن نشر كتابي من بداية الرحلة.

ثالثا: بالنسبة لأي كاتب لسه في أول طريقه

أول نصيحة " متخليش حلمك أنك تشوف اسمك على الكتاب أنك تتسرع في اختيار دور النشر.

تاني نصيحة "متصغرش نفسك" متسمحش لحد أنه يصغر منك لمجرد أنك في أول طريقك وده مش معناه أنك مش تصقل نفسك لازم طول الوقت تشتغل على نفسك من الحياة والكتب والناس وكل حاجة بدور في فلكك.

رابعا: أيه شروط اللي تختار بيها دار النشر الكويسة؟

1-يكون توزيعها كويس: يعني تنزل تبص بعينك على المكتبات زي الشروق وغيرها من مكتبات المعروفة، وأسأل المكتبة نفسها عن توزيع الدار كمان، متصدقش كلام أي دار نشر أن أحنا بنوزع في كل المكتبات إلا لما تشوف بعينك فعلا لأن كلام الليل مدهون بزبدة، وبردوا لما تسأل حد متعتمدش على كلامه لوحدوا زي ما قولت جمع كل النقط اللي أنا هكتبها وأعملهم مع بعض لأن أحيانا بردوا بيكون اللي واقف في المكتبة معندوش الفكرة الكاملة عن توزيع دور النشر الكويسة.

2- أهم حاجة تكون دار النشر سمعتها كويسة جدا: يعني معاملتها كويسة من حيث المرونة مثلا في اختيار الغلاف و مش بتقل أدبها لما يحصل خلاف بينكم، وتوزيع الكتاب، ومحاسبة الكاتب في أوقات متفق عليها، طيب ده هتعرفوا منين أسأل كذا حد من اللي نشروا معهم، وبردوا متعتمدش على ده بس لأن ممكن حد يكون خايف يقول الحقيقة، فمع أنك هتسأل الناس اللي نشرت مع الدار هتدخل على جود ريدز وتشوف إصدارات الدار دي إصدارات على مستوى جيد والقاريء بيحب إصدارتهم ولا دار نشر بتنشر أي حاجة والسلام عشان تسترزق من ورا الكاتب، بالإضافة أنك تشوف التوزيع زي ما قولت.

3- طيب نيجي لقسم فلوس النشر: في دار بتقولك هننشر ليك الكتاب ومش هتدفع حاجة خالص لكن في نفس الوقت مفيش ربح ليك.

- وفي دار بتقولك هتدفع أنت النص وأحنا النص وفي طبعا نسبة ربح للكاتب وللدار.

- وفي داربتقولك أنت هتدفع كل حاجة الكاتب وليك نسبة ربح والدار كمان.

وبيكون في عقد الأفضل تخلي محامي يراجعه معك.

كم نسبة الربح بين الكاتب والدار فيما سبق " الله أعلم".

4- طيب أيه دور النشر الكويسة؟

دار كيان ليه صديقة نشرت معهم وشكرت في معاملتهم والتوزيع والمحاسبة.

.ودي صفحتهم الرسمية

https://www.facebook.com/Kayan.publishing/

في دور نشر كتير طلعت لكن أنا معرفهاش لأني نشرت كتابي من 3 سنين تقريبا، وفي دور نشر ظهرت كتير ومعنديش فكرة عنهم.

وربنا يوفقكم ويحقق كل أحلامكم، ودايما أفتكروا أن ربنا خلقنا بالموهبة ومستني مننا أننا نشغل عليها ونكبرها، ربنا معانا كلنا في أحلامنا.

ده اللي أنا فكراه دلوقتي ولو افتكرت حاجة تانية هرجع أكتبها إن شاء الله.